PlayStation 5 Pro sentyabr ayında Yaponiyada keçiriləcək sərgidə təqdim olunacaq

PlayStation 5 Pro-nun ən çox ehtimal olunan buraxılış yeri məlum oldu. 

Media müşahidəçilərinin fikrincə, Sony korporasiyası PS5 Pro-nu Tokio Oyun Şousunda elan edəcək. Bu, dünyanın ən böyük illik oyun sənayesi sərgilərindən biridir. The Shortcut müəllifləri bildiriblər ki, Sony-nin yeni konsolunu təqdim etmək üçün daha yaxşı yer və vaxt olmayacaq.

Materialda bildirilir ki, Sony sonuncu dəfə 2020-ci ildə, PlayStation 5-in buraxılışına bir neçə ay qalmış Tokio Oyun Şousunda iştirak edib. 2024-cü ildə tədbir 3000-dən çox stendlə 26-29 sentyabr tarixlərində baş tutacaq. “Bu, hər il sərgidə iştirak edən çoxsaylı ziyarətçi və şirkətlərə görə yeni avadanlıqların təqdim edilməsi üçün ideal yerdir”, - jurnalistlər qeyd ediblər.

Sony-nin konsolu Yeni il bayramları öncəsi geniş satışa çıxarmaq istəsə, payızın əvvəlində nümayiş etdirməsi də daha məntiqlidir. Eyni zamanda, “The Shortcut” ekspertləri qeyd ediblər ki, Sony-nin əsas diqqəti Qərb auditoriyasına yönəlib. Bu, Yaponiyada PlayStation konsollarının Nintendo Switch və digər mobil konsollar qədər yaygın olmaması ilə əlaqədardır.

Mayın sonunda “Moore's Law Is Dead” YouTube bloqunun müəllifi bildirib ki, qurğu 2023-cü ildə buraxılmağa hazır olsa da, Sony qəsdən yeni oyun konsolunun buraxılışını təxirə salıb. Şirkət buraxılışı elə gecikdirdi ki, konsolun buraxılışı əsas oyunların - məsələn, GTA VI-nın buraxılışı ilə üst-üstə düşsün.