Bloqer Zak Nelson Samsung-un ən nazik smartfonunu iki yerə sındıra bilmədi.
Məşhur bloqer Zak Nelson (JerryRigEverything) yeni Samsung Galaxy S25 Edge smartfonunu videoda sındırmağa çalışıb. Video müəllifin YouTube kanalında yayımlanıb.
YouTube-da 9,3 milyon izləyicisi olan bloqer cihazların möhkəmliyini yoxlamaqla məşğuldur. Entuziast yaxınlarda təqdim olunan Galaxy S25 Edge modelini zədələməyə və sındırmağa cəhd edib. Samsung bu cihazı özünün ən nazik smartfonu adlandırır. Lakin bloqerin bunu bacarmadığı bildirilir və o, cihazın yüksək keyfiyyətini vurğulayıb.
JerryRigEverything telefonun ekranında cızıq buraxmağa çalışıb və qeyd edib ki, yalnız Moos sərtlik şkalasında 6 bal olan minerallarla təmasda izlər görünməyə başlayır. Daha sonra o, ekranı alışqanla yandıraraq zədələməyə cəhd etsə də, ekranın matrisi buna davam gətirib.
Sonda bloqer Galaxy S25 Edge-in korpusunu iki əli ilə bükərək iki yerə sındırmağa çalışıb. O, titan çərçivənin bu testi uğurla keçdiyini təəccüblə qeyd edib. “Bu test Samsung-un qələbəsi kimi dəyərləndirilə bilər və çox güman ki, telefonun möhkəmliyi ilə bağlı bütün tənqidləri bitirəcək”, – deyə Android Police nəşrinin müəllifləri videoya münasibət bildirib.
Samsung şirkəti rekord dərəcədə nazik olan Galaxy S25 Edge modelini may ayının ortalarında təqdim edib. Cihazın qalınlığı cəmi 5,8 millimetrdir. Müqayisə üçün, Galaxy S25 flaqman modelində bu rəqəm 7,2 millimetr təşkil edir.
